I samsvar med Plan- og bygningslova, plandelen § 12-8, vert det varsla om oppstart av planarbeid etter § 12-3 – Privat detaljregulering for Holvika, gbnr 338/243, bustad i Kinn kommune.

Tiltakshavar for planarbeidet er Sølvberg Bygg v/ Roger Rimstad.

Formål/Bakgrunn for planarbeidet:

Formål med planarbeidet er utvikling av eksisterande bustadområde i Holvika. Med nærleik til daglegvarebutikk og barnehage vert dette sett på som eit attraktiv område for utbygging. I tråd med overordna planar skal området regulerast til bustad, med tilhøyrande tilkomst innanfor gbnr. 338/243. Det er tenkt å legge til rette for variert og ei meir kompakt utbygging med etablering av eine-/fleirmannsbustad, småhus/rekkehus. Det skal i planarbeidet også vurderast tilrettelegging for etablering av eit «eldretun». Varsla planområde utgjer om lag 13 daa og inkludera delar av riksveg, samt del av gbnr. 338/48 for å sikre tilfredsstillande siktsoner til fylkesveg. Planområdet kan verte justert i planprosessen.

Det vert lagt vekt på at tiltak skal tilpasse seg det bygde miljøet med tanke på volum, siktlinjer og materialbruk. Gjennom planarbeidet skal det blant anna utarbeidast utomhusplan, 3D illustrasjonar og sol-skygge analyser.

I gjeldande kommuneplan, Kommuneplan for Vågsøy 2002-2014 Arealdel er arealet avsett til offentleg bygging, bustadområde og forretning. Kommuneplanens arealdel er under rullering for området, og arealet er føreslått avsett til bustad (B020) og sentrumsføremål (SF002), med omsynssone for støy, gul støysone H220_1, samt faresone for flaum, H320_5. Planforslaget samsvarar i hovudsak med framlegg til KPA til første gongs høyring. Aktuelt område vert sett på som ei naturleg utviding av etablerte område, og såleis ynskja vidareført som bustadområde, jmf. Referat frå oppstartsmøte. Dette vil også bidra til å fortette i allereie etablerte områder, og fremme utvikling av eksisterande bygder.

Det er ikkje registrert kulturminne eller viktige naturvernområde innanfor planområdet. Planarbeidet vil med bakgrunn i dette ikkje føre til irreversibel skade for naturmiljø eller gje ei vesentleg samla belasting på økosystem. Delar av planområdet ligg innanfor aktsemdsområde for kvikkleire og snøskred. Det er synt til fjell i dagen ved fleire plassar innanfor planområdet (sjå planinitiativ). Det er også etablert ein lågspentkabel innanfor området og sørlege delar av planområdet ligg innanfor gul støysone.

Utgreiingsbehov og vurdering i høve forskrift om konsekvensutgreiing

Det vart gjennomført oppstartsmøte med Kinn kommune den 27.03.2025, der kommunen tilrår oppstart av planarbeid. Tema som skal vurderast særskilt i planarbeidet er blant anna: Landskap, estetikk og byggeskikk, naturmangfald og vassmiljø, friluftsliv, jordvern og landbruk, teknisk infrastruktur, trafikktryggleik, universell utforming, folkehelse, barn og unge m.fl. Verknad av desse vil bli vurdert i planomtalen.

Kommunen er samd i vurdering om at planarbeidet ikkje vil utløyse krav om konsekvensutgreiing (KU). For meir informasjon i høve planfagleg bakgrunn, vurdering av konsekvensutgreiing samt verknadar av planforslaget sjå utfyllande planinitiativ og oppstartsmøtereferat.

Medverknad og høyringsfrist:

Fagmynde, grunneigarar/naboar mfl. vert inviterte til å kome med innspel gjennom varsling og kunngjering av planoppstart. Det vert lagt opp til tett dialog og avklaringar med aktuelle fagmynde undervegs etter behov.

Det vert med dette også invitert til dialogmøte med grunneigarar måndag den 5 mai, kl. 1630. Stad for oppmøte er: BlinkHus Måløy (Solvang Næringspark), Ulvesundvegen 1, 6718 Deknepollen

Dei som har innspel, merknader eller spørsmål til planarbeidet kan vende seg til iVest Consult innan 02.06.2025.