I samsvar med Plan- og bygningslova, plandelen § 12-8, vert det varsla om oppstart av planarbeid etter § 12-3 – privat forslag til detaljregulering. Aktuelt planområde er gbnr 25/60 m.fl og hovudføremålet med planarbeidet er tilrettelegging for fritids- og turistføremål samt småbåthamn. Tiltakshavar for planarbeidet er Johan Kragseth.

Føremål/bakgrunn for planarbeidet:

Føremål med planarbeidet er  å legge til rette for etablering av campingplass og marina på gbnr.25/60 i Vanylven kommune. Planforslaget vil omfatte bubilparkering, utleigehytter og småbåthamn med molo. Deler av fritids- og turistføremålet er planlagt på fylling i sjø der det er ønskjeleg å nytte masser frå Stadt skipstunell. Tiltaket skal gjere Sylte meir attraktivt som reisemål.

Det totale planområdet vil utgjere om lag 26,5 daa.  I gjeldande kommuneplan vedtatt i 2014 er området i hovudsak avsett til noverande offentleg eller privat tenesteyting (E36) og småbåthamn (SH23). I føresegna til kommunedelplanen er det lagt til rette for å kunne etablere reiselivsverksemd innanfor E36.

Det er gjennomført oppstartsmøte med Vanylven kommune den 22.10.2021, samt dialog i etterkant for å avklare tilhøva til KU-forskrifta. Planavdelinga vurderer planarbeidet til å følgje opp hovudtrekk og rammer i overordna plan, og det er difor ikkje stilt krav om planprogram eller konsekvensutgreiing.

Tema som skal vurderast i planarbeidet er mellom anna landskap, estetikk og byggeskikk, strandsone, folkehelse og friluftsliv, barn og unge, trafikktryggleik og stadutvikling.

Vurdering i høve forskrift om konsekvensutgreiing:

Planarbeidet skal stadfeste vidareutvikling av området i samsvar med prinsipp og føringar i overordna plan, og omfattar ikkje tiltak i vedlegg I. Planarbeidet fell såleis ikkje inn under Forskrift om konsekvensutredninger §6. Planen gjeld tiltak etter plan- og bygningslova, og fell såleis heller ikkje inn under forskrifta §7. Planlagde tiltak er konsekvensutgreia i overordna plan og er i hovudsak i tråd med denne planen. Tiltaket er såleis vurdert å ikkje falle inn under forskrifta §8. Verknader av plan vil bli vurdert i planomtale.

Medverknad:

Fagmynde, grunneigarar/naboar m.fl. vert inviterte til å kome med innspel gjennom varsling og kunngjering av planoppstart. Det vert lagt opp til tett dialog og avklaringar med aktuelle fagmynde undervegs etter behov.